軒仔齋睇冇得食畀女僕玩殘
歌手張敬軒早前到日本公幹，冒認「農夫」到女僕餐廳初體驗，卻沒有想像般享受！皆因女僕們未完成「全套服務」都唔畀食嘢，搞完一輪睇到軒仔嗌攰。
忙於籌備6月紅館演唱會的張敬軒（軒仔），早前抽空與電台DJ細So結伴到日本做直播節目，期間偷閒去「女僕餐廳」朝聖，事後軒仔在社交網開心Share。片中可見，兩人戰戰兢兢面對高呼「主人返嚟啦」的女僕們，被問如何稱呼時，軒仔靈機一觸稱細So做「農夫」（FAMA），自己就叫C君：「出嚟玩唔用真名是常識吧！」
兩人落完柯打，女僕火速送上飲品，要求他們一同唸令飲品變好味的「咒語」，講足20秒！話口未完，女僕又奉上食物，令軒仔不禁笑說：「畀我抖吓得唔得，Very tired。」雖然女僕聽錯以為他肚餓，但食前照舊要唸「咒語」，今次還要做埋Kawaii動作，軒仔與細So為食餐飯乖乖照做，豈料餐廳突然熄燈及響起音樂，原來要睇埋女僕又唱又跳先至食得！
遭余安安捕獲
軒仔睇完表演，突然聽到有人叫其名字，原來是藝人余安安！兩男「斷正」大感驚訝，軒仔抵死笑說：「我哋要即刻變男僕！」最後，女僕邀請兩男戴貓耳合照賣萌。體驗後，軒仔鬆一口氣說：「真係好攰！食一餐飯好似飲咗四餐茶咁，見番太陽嘅感覺真係好！」
文：音樂組