處「便」不驚 遮風擋雨好前度 蝦頭愛到分離仍是愛！

忍屎忍氣 似足看護

扮大細碼「女神」鄭欣宜、徐子珊都掂過碌蔗嘅「喜劇之后」蝦頭，同曾經孖住周星馳搵食、憑IQ 146所創嘅網上作品點擊率過億嘅邵子風「隱分」十個月！分手唔單止冇話玉石俱焚一鑊粥，反而邵子風一夫當關，話問題係自己，狂讚蝦頭分埋手都肯做大龍鳳，繼續見佢啲姨媽姑姐，仲話有佢包容同支持先至冇去自殺，以後都會守候佢身邊！可以講得出呢番說話，證明蝦頭真係極品！面對有躁鬱兼腸激症嘅邵子風，蝦頭忍屎忍尿又忍氣，等於做私家看護一樣！做看護都話晒有汗出有糧出，但係蝦頭齋出汗咋！

情緒影響健康，邵子風話過去十年，幾乎每星期都喺公眾場所「瀨屎」，除衫當屎片用！張國榮同張曼玉喺《阿飛正傳》嘅經典場面「一分鐘朋友」浪漫到死，但係對邵子風係痛苦到「屎」，一分鐘都忍唔到，隨時一褲都係！男友變屎撈人，唔係個個忍受到，目擊多次「臭史」嘅蝦頭，照單全收，處「便」不驚！毫無先兆下，一係High到暈，一係失控發老脾甚至狂喊，再唔係就「山洪暴發」，好在蝦頭擅長扮嘢搞笑，執生技巧有番咁上下，否則點頂！就算去到分手，Sad到空肚都唔食早餐，蝦頭愛到分離仍是愛，冇話拍拍籮柚走咗去，反而陪邵子風一齊痛，街照去飯照一齊食，好似做物理治療咁，一步步令邵子風再企番起身，再世為人，亦都冇話玩長恨歌數臭猛呻，仲話永遠都愛對方，有幾多女人做得到？

分得好 人品自然好

你話你嗰件有幾好幾索都係假，未同你去到最後都未知，埋單計數先講啦！都話男女永遠冇平等，尤其分手，會話女人好陰功，乜青春都白費晒，但係男人嘅時間唔係時間，仲被人話係負心漢，你睇唔少女仔聲聲賤男，開Post貼埋大頭相力數公審，唔睇真仲以為係《警訊》公布最新通緝犯！都話女人發難唔係人咁品，尤其當街攤牌吵大鑊，講唔夠兩句郁手郁腳，話就話打還打，唔好打面，火紅火綠時，女方大巴大巴咁車埋嚟，爛佬怕潑婦，強如金仔都驚啦！所以，分手同打麻雀一樣，都睇到人品，分手分得有品，證明人品都唔差得去邊！恨人亦要花氣力，何需反轉豬肚就係屎？就算真係畀楊千嬅講中，一世人流流長，真係遇到個人渣，早「渣」不如唔好「渣」，早放早享受！

Nuts哥