莊思敏生日望「跪低」斟茶

女星莊思敏昨日現身由藝人莫家淦創立的手錶品牌活動，昨日生日的她自爆曾靠典當手錶度日：「我都窮過，十幾年前同經理人發生問題，年幾冇工開，就當咗四隻錶捱咗一年，都當到六位數。」問到為何不問拿督父親攞錢？她揚言不會在父母面前「跪低」：「除咗結婚嗰日斟茶之外。（生日願望係咪向父母跪低？）係，哈哈，盡快！」同場的無綫主持梁麗翹三星期後便到預產期，老公最近不在港，希望BB不要太早出世。