吳綺莉女兒吳卓林在加拿大拍片尋父，聲稱與女友Andi三餐不繼兼瞓橋底，成為全城熱話。連日閉關的吳綺莉昨午一時許臉容憔悴離開大坑住所，駕車到北角買豆腐及滷水鵝。問到卓林公開認成龍做父親等問題，她對「成龍」二字全充耳不聞！

吳綺莉接受本報電話訪問時，對於好友郭秀雲爆料指Andi的母親曾提出索取數萬元照顧卓林，她坦言Andi動作多多，目的是向她索取金錢！並自嘲：「我身無分文，都要努力工作嚟維持生活，我咩都唔想理，希望佢好好睇住我個女嘅健康，呢樣嘢最重要。」對於卓林想出自傳，吳綺莉表示去年曾聽聞，但認為女兒年紀還小，沒甚麼經歷可寫，覺得只有對社會有貢獻的成功人士才可出自傳，更指是Andi的主意：「唔該嗰位三十幾歲嘅老師，好好哋搵工，唔好成日將我個女放上神枱供奉，個女梗係乜都聽佢講！其實卓林以前好乖，自從識咗佢之後就變晒！」

另外，卓林拍片前一天，Andi在社交網以英文發長文，指自己作為教師，見到很多家長不懂教仔，只懂說教，及只想子女去完成他們的夢想等，怎料她的朋友幾乎一面倒爆粗狂罵，以「垃圾」形容她，其朋友留言：「咪做垃圾！快搵嘢做！個個都知你想喺成龍個女身上攞啲乜！」、「你成三十歲人，點解唔搵工畀卓林有瓦遮頭？你殘廢定心理有問題？」、「老師！唔好再叫卓林去乞錢！」、「你愛卓林，應該叫佢返阿媽屋企！」對於Andi的發文及朋友留言，吳綺莉不作回應。