鍾嘉欣讚胎兒識做 轉位置就靚媽
「靚媽」鍾嘉欣昨日出席腕錶活動，透露腹中BB快將6個月大，稍後返加拿大待產，預計10個月後才再返港。談到佗B情況，嘉欣說：「兩日前我個肚凸晒出嚟，試衫時條褲好窄，點知今朝起身個肚又縮番，真係好識做。（識得幫你搵錢！）識呀！適當時佢就換位置，等我靚啲，個肚睇落唔係好大，依家未知仔定女，等到時有驚喜。（BB成日踢你？）佢夜晚先起身，時不時（R）吓我咁。」
問到老公是否日日聯絡她？嘉欣笑指有視像溝通，但老公湊女有點雞手鴨腳：「真係辛苦老公，依家佢一星期湊個女三日，其餘時間畀奶奶同媽咪湊，但個女唔畀佢換尿片。老公對住我反眼，話佢已經盡咗力，所以好珍惜我，叫我快啲返去，睇到個心好噏。」談到好姊妹苟芸慧籌備婚禮，嘉欣指屆時應未能擔任姊妹團，但會盡力協助對方。