張家輝有錢就任性 撕毀苗僑偉形象
影帝張家輝第三次執導演筒，對於「新生兒」《低壓槽》即將與觀眾見面，他非常看重，「一針一線」都嘔心瀝血，上至劇本下至演員服裝都要「話事」，就如片中扮演警界高層的張可頤角色造型，家輝亦絞盡腦汁：「佢位高權重，但我唔要佢着黑色套裝，佢要着高跟鞋同衣着鮮色，唔靚唔着！」
由於較上部執導作品製作費多1億，令家輝今次相當「任性」，凡事都要達到自己要求，幸得台前幕後配合。對於自己的創作，他十分執着及堅持：「即使劇情講只係攞衫去洗衣店洗嘅（角色），我都親身演繹好幾次。我將主角好似徐靜蕾同苗僑偉（三哥）以往螢幕好人形象完全撕毀，例如三哥演嘅江湖大佬以前係警察，跟住迷失變節，過冇靈魂嘅追悔人生，佢就從來冇演過呢類角色，各演員都畀到驚喜我。」
身為女主角的張可頤自電視劇《十萬噸情緣》後相隔15年再與家輝合作，談到張導演，她笑說：「基本上佢冇乜點變，但以前唔會指點我演戲。佢對所有嘢都好認真，連演員點講一句對白都理埋。（佢搵你即刻應承？）佢拍開警匪動作片，我好好奇點解搵我，所以答允。（片酬吸引？）咁我信佢唔會待薄我嘅。」
文：影視組
場地：馬哥孛羅香港酒店