欣宜冧人夫紅館挑Kay
處女個唱上驚爆紅館夢成真後第二個夢想就是結婚生仔的鄭欣宜，夢中情人點名「絕世好男人」張繼聰！引得「銀幕情敵」謝安琪以一條超高衩長裙現身宣示主權，又在台上爆欣宜有秘密！
鄭欣宜（Joyce）一連兩場紅館騷前晚開鑼，在台上表現風騷又賣力，全晚換了六套衣服，包括低胸透視魚尾長裙，連她都忍不住佻皮地說：「嘩！我着透視裝呀！」又十分興奮地說：「事實證明只要堅持同努力，夢想就可以成真，我嘅紅館夢成真喇！」然後她笑說：「係時候追求第二個夢想，就係搵個夢中情人結婚生仔，大家話係咪？」單身的她隨即向「夢中情人們」大表傾慕之情，包括許志安、陳小春和謝霆鋒，第四位就點名曾在戲中做她男朋友並上演過爆房戲份的張繼聰：「佢有樣有身材，夠大隻畀到我安全感，再加上又顧家又有幽默感，邊有咁好嘅男人？」
台上邊唱邊喊
原來Joyce是趁機介紹嘉賓之一的謝安琪（Kay）上場，二人甫見面就互錫面珠，十分老友。她感謝對方答應做嘉賓，Kay拖住欣宜的手說：「我真係欣賞咗你好耐，我認識嘅鄭欣宜有好多面，呢個係我哋之間嘅秘密，我當然唔會公開喺度講。我想話畀你知，你喺我眼中永遠都係咁美麗！」
尾聲時，Joyce在台上鄭重地說：「我有個好大嘅遺憾，就係佢無法睇到我第一個紅館騷。」暗指已過世的母親沈殿霞，台下觀眾紛紛出言鼓勵，她續說：「但係我知道，呢個騷嘅成個過程，佢都一定喺度陪住我，最後一首歌我要送畀我嘅最愛。」隨即唱出《給最開心的人》，期間忍不住邊唱邊喊，場面感人。
文：音樂組