葉翠翠撐B狗共處 免疫力高
對於陳柏宇考慮到太太生B及愛犬打交問題未解決，最壞打算會將狗交朋友家暫住，已為人母的葉翠翠和孫慧雪均表示養寵物和懷孕沒有衝突。現時養貓的葉翠翠說：「如果有兩隻狗仔鍾意打交、有攻擊性，可以試吓多啲陪伴佢哋。另外好多人誤會懷孕唔可以養寵物，話有菌同蟲，但依家有科學根據，BB係可以同寵物一同成長，免疫力會較高。若有人問我BB出世後點同屋企貓仔相處，我唔會諗呢個問題，因為寵物都係家庭成員，正如你唔會問BB出世同哥哥、爸爸點相處。」
阿雪囝囝收「o靚」
家有三隻狗的孫慧雪則說：「好彩我懷孕時冇呢啲問題，狗仔知道我大肚，唔會跳上我個肚度。囝囝出世後，狗仔好錫BB，每逢BB喊，狗仔第一時間衝去床邊，又會舔佢，依家狗仔好似(口靚)咁跟住BB。」至於身為愛護動物協會會長的傅明憲說：「希望佢盡快搵訓練員教兩隻狗狗點樣同Baby和諧共處，協會都有狗狗訓練員同犬隻訓練班，主人同愛犬可以一齊上堂。」
熱愛動物的郭秀雲認為：「如果養養吓唔要佢，好似唔人道，但香港住嘅環境有時好細，如果係大狗，或可能有攻擊性，太太又啱啱要生BB都會擔心嘅，咁我建議搵中間位，搵朋友暫養先，或搵狗隻訓練員幫手，逐步嚟。」她續說：「依家又唔係唔要隻狗，我覺得太過多管閒事，第一次生仔女，係好緊張o架，應該祝福佢哋囉。」