萬人迷碧咸（David Backham）去年讓6歲愛女夏柏舒芬（Harper Seven）坐大髀揸高爾夫球車，引來網民狠批罔顧安全，寵女寵出禍！但他似乎仍未識死，近日於社交網上載愛女坐於司機位緊握軚盤揸車的影片，再惹網民炮轟！
孻女拉心肝！出名勁錫細女夏柏的碧咸，日前在社交網Instagram的實時動態上載父女聚天倫的影片，除有夏柏Cute爆與公仔排排坐等美甲外，更有人仔細細的她坐在爸爸大髀緊握軚盤揸車一幕！從片段周圍環境所見，架車的確行駛中，似乎是由夏柏控制軚盤，碧咸則踏油門，望落相當牙煙。而碧咸亦於片中加上留言，講明事發地點為私人地方：「講清楚，我哋喺我嘅車道上，但係……」後面就加個猴子掩眼的表情符號（Emoji）。
短片一出即惹來網民於各大社交網留言聲討，指身為老竇的碧咸公然罔顧安全，畀囡囡揸「大膽車」，離晒大譜！其實碧咸去年12月已於老婆Victoria上載的短片中，被拍到讓夏柏坐大髀持軚盤駕駛高爾夫球車，當時已引來爭議，被狠批唔識做人父母，今次再公然犯錯，似乎仍未受教訓。
另一方面，剛滿44歲的Victoria日前上名嘴James Corden節目，宣傳新運動品牌服飾系列。平日Cool爆的她瞓身出演趣劇，又隊酒又扮墜機受傷，落力大放笑彈！
文：外娛組