美國青春女星Cailee Spaeny首次拍戲，便在大片《悍戰太平洋2︰起義時空》（Pacific Rim: Uprising）擔正女主角，究竟她是如何從一個小鎮姑娘獲得荷里活的青睞？
20歲的Cailee來自密蘇里州斯普林菲爾德一個9兄弟姊妹的大家庭，只拍過一套學生短片，但首次闖荷里活，便在《悍戰太平洋2︰起義時空》擔正。她受訪時談到最初愛上表演，是因為在教堂唱歌與夾Band，她獲家人支持，4年間每個夏天都會駕車穿州過省到處試鏡：「我媽會揸車由密蘇里州去俄克拉何馬州、德州、新墨西哥、內華達州再到加州，期間會周圍住，試過有4個月住喺一個喺教堂識到嘅家庭嘅一間細房入面，包括我、我媽同兩個細佬妹。有次我哋成家住一間廉價酒店，我哋都以為自己會冇命！我爸留喺家鄉賺錢，寄生活費畀我哋用。我都好掛住呢種流浪生活，去Cracker Barrels食嘢，睇大峽谷，每次我可以展開公路旅程都會好興奮。」
不過Cailee一直未能成功得到演戲機會，直到《悍》片落實選角前一個月，她向經理人表示想在該片演路人角色，於是自拍短片介紹自己，但方式卻是反傳統！她說：「通常經理人會叫你企喺塊白牆前面，打好燈，大特寫塊面，唔好咁多令人分心嘅動作，但我完全冇咁做。我戴上笠帽，整到成身大汗，搽到成塊面係泥，撞自己落地。我揸住支棍亂咁舞，又好似打人咁打一堆枕頭。兩個禮拜後我收到電話，同導演見面，並同男主角約翰保也加（John Boyega）試戲。」
在片中飾演機械人駕駛員的她，坦言第一次接觸藍幕拍攝，對住空氣做戲感到不知所措，所幸憑《星球大戰》（Star Wars）新系列冒起的新星約翰「照住」她：「我有時會頂唔順，話我個腦想像唔到我點樣喺巨型機械人入面，佢會帶我埋一邊，同我詳細講解，我覺得佢好似天使！而離開片場我又會擔心職業問題，究竟我會唔會有第二套片拍呢？當時我未有第二套片約，其他所有人已經有，佢同我講，唔使擔心，船到橋頭自然直。我諗佢見到我，就好似自己初出道時咁樣。」文：外娛組
被問到視哪位行內前輩為模範時，Cailee說：「我準備角色時，都參考咗好多電影嘅堅強女性。《異形》（Alien）嘅薛歌妮韋花（Sigourney Weaver）係其中一個最大嘅參考。艾美阿當絲（Amy Adams）係好戲嘅演員，又係超級好人。我又啱啱同Felicity Jones合作，佢會當你係人咁看待。當然仲有約翰保也加啦，佢其實唔需要照顧我。我依家緊張時都會傳短訊畀佢問意見。」問到誰是她的男神？她笑言：「係90年代嘅里奧勒度狄卡比奧（Leonardo DiCaprio）。」
出生日期：1997年7月24日
出生地：美國密蘇里州斯普林菲爾德
職業：歌手、演員
出道年份：2016年
文：外娛組