趙學而Sing戰紅館重奪最佳位置

事業急煞失眠爆喊

劇集《皆大歡喜》自2001年播出後大受歡迎，播至2005年才結束，身為主要演員之一的趙學而透露，最高峰時連續七星期不斷拍攝：「個摩打一路Run住，唔覺得唔放假係咩一回事，但突然所有嘢冇晒，合約又冇，工作又冇。開頭喺屋企都覺得OK，終於有時間可以抖吓，但抖得一、兩日就覺得唔係好慣，覺得個人好空，唔知點解無端端會喊，完全睇唔到將來有乜。」

初期學而的老公並不覺得問題很大，但她之後接近半年經常失眠、不願出街，還暴瘦至80幾磅，學而坦言：「死啦！所有衫都唔啱着，我又唔願出去見朋友，跟住的起心肝睇醫生，醫生話我抑鬱，要食藥！」學而的老公不是圈中人，沒辦法體會其心情：「但佢一路陪住我，處理晒屋企所有嘢，起碼我一邊膊頭可以放輕啲。」

放大圖片	趙學而因患抑鬱暴瘦，一度得番80幾磅！	趙學而當年與梅小惠拍《皆大歡喜》，最高峰連續七星期不斷拍攝。

唱歌障礙睇開啲

填詞人黃偉文（Wyman）曾形容學而是其天使，能夠令他的作品獲得好成績，可惜學而被他邀請翻唱陳慧琳的《最佳位置》時，仍未能克服心理障礙：「究竟係咪應該咁樣唱呢？監製同錄音師所講嘅每句說話，我都聽到係好負面嘅嘢，好難將自己嘅信心攞番嚟！」學而指錄音過程辛苦，但經過Wyman傳短訊鼓勵，最後亦順利完成歌曲。

趙學而翻唱《最佳位置》時，靠黃偉文短訊鼓勵才順利完成。	放大圖片	趙學而感謝老公多年來陪伴及支持。

其後學而又因藥物副作用而經常抽筋，但因此學會放開懷抱：「既然始終都要面對，點解我唔嘗試令自己心情放鬆啲？唔靠藥物，我希望自己可以面對得到，有乜咁大不了啫！工作啫！」多年來，工作一直佔學而心目中非常重要的位置，不過受到老公影響，她學懂生活其實還有其他重要的事情。

以慢歌為主的趙學而，曾在演出時感觸落淚。	放大圖片	趙學而希望歌曲能引起台下觀眾的共鳴。

人誰無錯無懼失準

提到將於月底舉行的處女紅館演唱會，學而並不覺得等了很久：「李克勤都30年先攞到《叱咤》！我唔怕嘥時間去等，只係怕等到之後，效果做得唔好。」至於上次九展騷有點失準，今次可會擔心？學而認為每個人都有機會出錯：「我哋唔係機器，尤其歌手靠情緒演繹歌曲，我再將感覺投放畀觀眾，少少失準我覺得情有可原。」

過往學而在大型場地演出的機會不多，加上其歌曲多屬慢歌，到了紅館就要運用不一樣的能量，她坦言對這次的製作團隊很有信心，大讚無論宣傳、服裝、化妝及音樂等方面都非常專業。

背後男人自動封口

問到老公今次又如何表達支持？學而指對方盡量給她時間休息：「佢要調校自己少啲講嘢，畀多啲寧靜空間我，等我可以再諗吓演繹歌曲嘅時候應該點，佢都好配合到！」兩人來自不同工作範疇，日常溝通非常重要，他們習慣直接說出心底話，令大家容易明白，不用猜測，亦不用委屈地遷就對方，因此夫妻感情非常甜蜜。

文：音樂組

攝：劉斌

髮型：Pakho@POPEIGHT

化妝：Gabbie Lee

場地：香港九龍貝爾特酒店