謝安琪嘴仔軟「唇」服張繼聰
索爆人妻謝安琪（Kay）及王君馨（Grace）昨日現身化妝品牌活動，齊齊晒事業線「派軍糧」，場外吸引大批途人圍觀。Kay透露獲化妝師讚唇形靚，問到老公張繼聰有冇讚？她怕醜說「好難唔讚」，又笑指老公早已認定她的嘴是「潛力股」，夠晒軟。
同老闆爭歌險報警
談及工作，Kay表示每日都與老闆麥浚龍（Juno）開會傾創作，並大爆曾與對方爭歌：「上次有首歌係寫畀我，但佢就話我太多歌佢想要，我話唔得，差啲報警。（咁邊個爭贏？）我贏咗。」她透露5月將閉關錄音，預計今年內出碟，打趣指若趕不上計劃進度，一定是Juno問題。問到可有計劃開騷？她坦言一切以出碟行先，開騷則留待年底。
至於Grace表示婚後更加要Keep得好，又稱很滿意現時身材，問到可會接泳衣騷？她坦言不會，或者由老公操刀拍泳衣寫真：「尺度可能會大啲，但唔好影完唔畀我Post。」
王君馨做姊妹保鏢
提到好姊妹苟芸慧的婚事，Grace表示一切等待對方「指令」：「我哋個個都會係姊妹，畀晒期出嚟夾邊日就得，但依家咩都未知。」問到準備甚麼禮物？她笑稱自己是禮物：「可以做保鏢，或者做奶媽幫鍾嘉欣湊B。」另外，鍾嘉欣本月19日將返港出席化妝品牌活動，是她佗第二胎後首度在港公開露面。
文：音樂組