林嘉欣唔熟高科技靠老公解讀「外星文」
影星林嘉欣昨日到尖沙咀出席手機活動，透露下星期為英皇電影《廉政風雲 煙幕》開工，與影帝劉青雲對手戲不多，主要用電話溝通，反而與影帝張家輝會於五月到澳洲拍攝外景一個月，笑言已跟屋企請假：「屋企人幫手湊女，兩個女返全日制，佢哋知我要復出拍戲，依家科技發達，可以視像保持聯絡。」
活動上嘉欣分享攝影心得，直言得到贊助手機後有跟導演老公袁劍偉在電車上互影，問到是否靠老公教影相？她說：「會！高科技嘢都係問佢，但我自己一邊耳仔入一邊耳仔出。（平時整電腦、相機都係老公負責？）係，我覺得呢啲係外星文，我郁啲就嗌救命，叫佢幫手。（老公有冇笑你？）佢習慣咗，知我傻瓜機先用得掂。」