張建聲陳嘉莉兩年情玩完

張建聲今年農曆新年與女友陳嘉莉拍拖到維園年宵攤位開檔，當時張建聲曾表示「儲緊老婆本」，似計劃拉埋天窗，當時Kelly亦甜爆表示「睇佢乖唔乖再考慮。」

少溝通多吵架

豈料事隔兩個月起了突變，昨日張建聲透過社交網發文宣布與Kelly已經分開一段時間，指因為他太專注事業所致：「原因是我太事業心重而忽略了身邊人，從而少了溝通多了吵架，而兩個人相處所產生的問題亦不是一朝一夕的事，中間的離合數次都令我們成長不少，經過認真的考慮，我們決定先放手，各自專注於工作上。」

張建聲更表示如果時間許可他們遲些才遇上，相信結果肯定不一樣，又說：「Kelly，感謝你給我這兩年喜與悲的回憶，亦多謝你的照顧、體諒和付出，希望無論在哪方面你都能幸福快樂，開開心心，感恩。多謝你。將來的事，就交給上天安排吧。」他更借古巨基《愛得太遲》的歌詞「盲目地發奮，忙忙忙從來未知，幸福會掠過，再也沒法說鍾意」，來表達此刻心情。

「事業同感情二選一」

就分手一事，記者聯絡上張建聲，他說：「冇時間陪佢係其中原因，其次大家方向唔同。（結婚問題？）係有傾過，但冰封三尺非一日之寒，其實分咗手一段時間。大家都覺得係時候公布，協議咗由我講先。總之係發生咗啲事，但咩事就唔講嘞。呢個係開端形成咗分手導火線。（可惜）一定有，拍咗兩年，佢好乖，事業同感情二選一，冇計。」

採：影視組

文：專案組