米九袁文傑舢舨變炮艇
1米88模特兒身形、有「高佬」同「米九」之稱嘅袁文傑，計樣計件頭，比起「美國隊長」基斯伊雲斯（Chris Evans），同埋「雷神」基斯漢斯禾夫（Chris Hemsworth）完全唔輸蝕，但入行28年，直至舊年憑《不懂撒嬌的女人》先至一柱擎天，個個「游生」前「游生」後咁叫，夠晒霸氣，風頭蓋過男主角林文龍同王浩信，依家拍住陳煒憑《果欄中的江湖大嫂》再下一城！
26年前拍過《家有囍事》
撈咁耐，佢都係舊年先拍到第一部見樣見真身嘅電影咋！佢之前嗰部都好巴閉，廿六年前拍住張國榮同毛舜筠做賀歲片《家有囍事》。冇吹水，我Nuts哥同大家一樣，睇呢部戲冇一百次都有九十九次，真係對白都識掉轉背番出嚟，原來佢就係做毛舜筠個表哥家明，即係出場時攬住婉君表妹得個背脊得把聲嗰個！
當年同古巨基係同期無綫藝訓班出身嘅袁文傑走咗去亞視，天生我才，就係生得高大靚仔，就算啲觀眾講唔出叫咩名，但一講「亞視型男」、「亞視帥哥」就一定知係佢！當然，亞視除咗佢，都冇乜邊個靚仔啦！最經典係去日本拍旅遊特輯，浸溫泉時裸出鏡，大晒冷成個八月十五高清任睇，唔少師奶甚至珠江三角洲班大媽，睇到春心蕩呀！問番佢點解要晒股，佢話成日拍溫泉鏡頭披住條毛巾，好悶啫！就係肯破格，當年就算喺弱台如亞視，只要肯畀啲諗頭，一樣都有人欣賞！
有勇有謀，唔好以為高大就冇腦，高大如袁文傑簡直「腦充血」上晒腦諗頭多多，除咗拍劇真係百足咁多爪，當年食住亞視個朵，喺廣東省都不知幾多人爭住搵佢登台，錢真係搵唔少，之後又搞條Channel專講波，全程冇吹水講到頭頭是道，唔少球迷必睇！最記得係有次佢愛隊阿仙奴輸波，唔知仲以為佢係領隊雲格，見佢痛心到一路分析，一路眼濕濕忍唔住喊，愛之深責之切！
勸雲格「及早離場」
今時今日，相信袁文傑諗都冇諗過，愛隊阿仙奴領隊雲格盛極而衰之時，就係佢當紮彈起之日！佢深信做人同踢波一樣，只要排啱陣式，就會爆出好成績，最緊要見好就收！雲格面臨下台壓力，袁文傑猶如大時代股神葉天上身，將「股壇必勝法」套入前曼聯領隊費格遜，指球場上永無真正贏家，「取勝唯一法：及早離場」！同埋凡事要計算，維持實力同穩定性先至夠長線襟做，啱Timing先出招，好似佢嚟一招「腳趾尾拉西」，一個配角「游生」就彈起，勁！
質晒幾個大卡士落一套劇度，未必有化學作用，等於搵C朗、美斯踢埋一隊，想玩死自己咩！唔一定做主角先係Sure Win，查實佢絕對有資格做「雲格」，幫TVB繼續「攞冠軍」，又或者佢愛隊阿仙奴不如搵佢取代兜踎雲格，打救兵工廠，真係舢舨都變炮艇喎！
Nuts哥