李婉華飛嚟捧場

黎瑞恩（小恩子）再踏紅館開騷，吸引不少圈中好友到場支持，首場有周慧敏（Vivian）、湯寶如、譚耀文、陳展鵬與女友單文柔、李婉華、關秀媚與男友人等。其中已淡出娛圈的李婉華，接受電話訪問時指特地由加拿大飛來捧小恩子場，問到會否上台獻聲？她謙稱不會：「啲嘉賓咁勁，我默默支持就得。全晚最感動係佢同班識咗好耐嘅合唱團朋友合唱，同埋唱《活得比你好》嗰時，台下個個女人都喊晒。」同樣曾是寶麗金藝人的Vivian亦在網上留言話好享受聽小恩子唱歌，並為她打氣。