Bob送囝囝入院騰雞搵床位
育有三女一子的藝人林盛斌（Bob），湊B經驗豐富，但小朋友病起上來，亦令作為爸爸的他愛莫能助、心情既焦急又擔心。Bob昨晨在社交網透露，7個月大的囝囝林道申因氣管敏感，呼吸不暢順，入了醫院，不過搵醫院期間搞到他一頭煙。
支氣管炎唔小嘢
Bob接受訪問時表示兒子身體不適，起初更懷疑他患上嘶哮症，後來醫院指他患上支氣管炎，Bob說：「囝囝病咗兩日，呼吸唔暢順，小朋友氣管軟同敏感，如氣管有細菌感染會收縮，咳得好犀利，又想作嘔咁。直到朝早5、6點，太太見到囝囝把聲好辛苦，個人又吽吽豆豆咁，太太就話頂唔住喇！要送佢去醫院。」
Bob決定送囝囝入醫院後，打電話問了幾間醫院都表示沒有病房，終於有一間叫他先帶囝囝到門診，但去到又話兒科正裝修，他直言谷鬼氣，後來才搵到一間醫院有床位。聲音疲累的Bob表示，跟太太整晚都沒怎樣睡過，安頓一切後，他即返家換衫開工，而太太及工人姐姐就留院照顧囝囝。
雖然Bob平日忙於工作，但一有時間即抽空陪小朋友，而太太就專職湊小朋友，Bob更不時在社交網上載太太湊B相，讚揚母愛偉大，兩人可謂圈中出名的廿四孝爸媽！
文：影視組