43歲李玟恨做媽媽打針抽卵博生兩件！
李玟（CoCo）、韓國男團Super Junior（SJ）成員崔始源、Amanda S.、MC Jin、莊思敏及周美欣等前晚出席派對，與外籍老公Bruce同行的CoCo自爆日前完成重慶巡迴演唱會，開騷前特別到紐約進行人工受孕抽取卵子，希望有機會成為母親，但過程非常辛苦：「本身好怕打針，但要自己打（賀爾蒙針），原先要打10至14日，不過身體冇反應，足足打咗三個星期，超過其他人！成個步驟要打三支好粗嘅針，以為做唔到，我不停鼓勵自己『I can do it』！」
後悔太遲：冇都唔緊要
CoCo透露已成功抽取一粒卵子，稍後要多做幾次抽卵，坦言有少許後悔不趁年輕去做：「知道好多女人去到50歲都可以生，以為自己好多時間，但原來超過35歲抽，啲卵子冇咁好，超過43歲仲難！今次都上咗堂課，希望今年至下年可以放番卵子入體內。（想生幾多個？）兩個，但呢樣係天賜禮物，最後冇都唔緊要。（點解有呢個決定？）我喺屋企排行最細，兩個家姐都錯過機會，輪到自己就覺得係時候。」CoCo表示老公知道她辛苦，但因他工作忙碌，故只由家人陪打針，直言感到女人的偉大。
莊思敏明崔始源
MC Jin透露將返紐約陪6歲兒子及太太放復活節假期，逗留四、五日再到北京工作。講到近半年人氣急升，變相減少與兒子相處時間，他表示仍在努力適應：「習慣佢出世後喺嗰邊照顧佢，接送返學、講故事陪佢瞓覺。依家分隔時間長咗，我每次去機場都同佢講，如果爹哋唔返工點買Game畀佢，佢就會叫我Go，變咗期待我返嚟。」西裝骨骨到場的崔始源事前表示不受訪，但仍企定定任影，還親民揮手示好。至於莊思敏笑言今次是來欣賞「藝術品」，即是型男崔始源。
