張敬軒分身降兩度女聲開騷

張敬軒將於6月15至17日在紅館舉行三場《HINSIDEOUT張敬軒演唱會》，相隔四年再在紅館開騷，他形容為「四年一閏」，席上唱片公司送了寫上「Hinsideout」掛畫，將它打橫放後，字樣變成「熱賣」，寓意個唱大賣，而門票今日起公開發售。

妹仔大過主人婆

今次軒仔以其自創網絡人物「降兩度」的女聲身份現身演唱會，他笑言是創舉，一張門票能睇到「兩個人」表演，並指被網民改名「牛池灣孔劉」、「火辣小甜甜」、「西營盤彭于晏」，自覺分界髮型有點似孔劉。

軒仔獲贈「熱賣」掛畫，寓意演唱會大賣。

軒仔指「降兩度」的造型一定比他靚。

問到會否以這些造型上台？軒仔說：「降兩度嘅誇張髮型係標籤，一定會有，造型上會用啲好誇張形式，但處理會好小心，因網上世界、社會上嘅道德界線好敏感，唔想畀人覺得純粹扮女人，或者有嘲笑成分，我哋唔係嘩眾取寵。我覺得今次降兩度嘅造型係會靚過張敬軒，妹仔大過主人婆。」

「三線藝人」做嘉賓

他笑言今次是降兩度出道暨暫別演唱會，問到可擔心降兩度比他更受歡迎？軒仔笑言：「咁就即刻變張敬軒暫別演唱會啦。」他又透露邀請了一位很勁的「三線藝人」做嘉賓，現正度期中，不能透露太多，像佗B一樣不夠月怕小器。

另外，軒仔自爆出席記者會前發生小插曲，他到中環的髮型屋整頭，原來到埗前不久，樓下的珠寶店發生搶劫案，見到櫥窗玻璃盡碎，警方在案發地點用膠帶圍起封鎖線，他得悉剛發生劫案後感到震驚和心寒，因閒時都會駐足該珠寶店門外看首飾。

文：音樂組