自封「魔鬼演員」 任達華恨揸槍拍打戲
影星任達華昨晚出席《紅》片慶功宴，戲中客串演編輯的他對於該片狂收36億人民幣大表高興：「香港冇軍隊，大家又冇受過呢種專業訓練，拍出咁嘅效果係奇迹。（略嫌戲份唔夠喉？）係呀，冇得打又冇得開槍。（再同林超賢合作，叫佢安排打戲？）一定會，我好想拍打，佢係出名嘅魔鬼導演，加埋一個魔鬼演員就更加好，我唔怕辛苦。（《紅》片有更多戲份嘅話，想角色點發展？）最好交代吓我背景受過槍傷，所以極力阻止海清鹵莽行動，人與人之間嘅感情細膩啲。（最想拍林導邊類型電影？）都係戰爭片同槍戰戲。」
任達華忽萌奇想，明言支持香港學生接受紀律及體能訓練：「最好一年有兩、三星期接受呢類課外活動訓練，對成長一定有幫助。（囡囡都受訓？）女仔就可以接受拉筋同跑步呢啲簡單嘢。」出身警察世家的他曾打算投考警察：「不過後來知自己鍾意拍戲。為咗今次客串我特登坐咗6個鐘車去湛江拍，本來飛去摩洛哥嘅，但當時我又拍緊《我的情敵女婿》，時間上唔容許。」
