有「宅男女神」之稱的無綫新人「大笑姑婆」被力捧，一劇接一劇，更有份做女主角，人前人後，佢都經常扮可愛，又好識做咁，買晒零食返去開工，慰勞吓啲拍檔，扮晒老友咁！新人呢啲嘢係要做嘅，不過有時啲嘢，真係要過得人又過得自己！
呢個妹妹仔，恃住依家有啲劇拍就懶懶閒咁，埋位前又唔熟讀劇本，成日喺度篤手機，到真係正式埋位咪狂NG囉！好多工作人員都看在眼裏。而佢另一個最討厭嘅地方，就係太嘈、太巴渣，畀化妝間啲梳頭阿哥、化妝阿姐喺背後狂鬧，成日喺化妝間嘈到不得了，搞到人哋頭都痛埋。好心佢有時間就熟讀吓劇本，家陣唔係小學雞放小息呀！
