被批今年佗龍鳳胎 林夏薇流晒口水：生3個！
藝人林夏薇2015年結婚，恨生B的她出席劇集宣傳時被批今年有機會夢熊有兆，甚至可能懷上龍鳳胎！薇薇聞言開心不已，更直言想生3個才封肚。
林夏薇昨日與黎耀祥、陳家樂及陳山聰等出席無綫新劇《逆緣》宣傳活動，席間大會邀得堪輿學家麥玲玲為眾人測字指點迷津。薇薇與老公莫贊生婚後一直恩愛，揚言要生小朋友的她，以「明」字問添丁，麥玲玲指她今年報喜機會高，更可能懷上龍鳳胎，同場的張美妮聞言即說：「薇薇條裙咁鬆，係咪有咗喇？」
同老公似同屋住
不過薇薇受訪時否認懷孕：「仲拍緊劇，未有住，不過希望承師傅貴言，龍鳳胎梗係好。（生完收工？）我好鍾意小朋友嘅，好想生3個，不過我同老公各有各忙，見都冇時間，好似同屋住，依家套劇拍到四月初，之後真係要停拍劇。」提到堂兄林峯宣布分手，她說：「我都係聽你哋講先知，唔會特登打畀佢問，最緊要佢開心。（見過佢新女友？）我連見我老公都冇時間呀！」
黎耀祥有機再做業主
另外，寫下「舒」字的黎耀祥被批今年有機會再次榮升業主，相反陳家樂寫「得」字被批今年財運略有進步，但置業則要靜待時機。問到祥仔是否有意買磚頭，他直認不諱：「我依家得一層，梗係想買啦！不過樓價好高，要等吓先。我聽人講，如果有二千萬買樓，最好斬開佢買兩層細單位，無論租同賣都容易啲。」家樂則直言會「聽話」，暫時多儲錢再作打算：「我真係想買嘅。（用嚟結婚？）一定係買咗樓先結婚，但我另一半仲年輕，畀多幾年時間大家拚搏先。」
文：影視組