甄子丹打出名堂，靠真功夫殺入荷里活，但他有感華語電影跟荷里活電影分別存在資源問題，華人並非作主導。他認為內地市場大有可為，預計將來有能力超越荷里活，華人演員要得到成功必須要爭氣。

「宇宙最強」甄子丹近年拍《俠盜一號：星球大戰外傳》及《3X反恐暴族：重火力回歸》等荷里活大作都大收旺場，他雖然指華人在荷里活的待遇與尊重都比以往好，但仍存在不平等：「10部有9部半電影都以白人為出發點，呢幾年的確係多咗華人演員，但好多都唔係主線，而係為市場需求擺落去。我好幸運自己兩個角色係主線，要得到平等要一段時間，當然要爭氣。」

他認為華語電影跟荷里活電影的運作模式及市場仍有距離，最大分別在於資源問題：「荷里活電影有一定資源，佢哋已經係企業化，而我哋仲停留緊自己生意咁，係最大缺陷。」不過他覺得內地將來可以超越荷里活：「如果拍畀13億人口睇，有13億嘅資源，喺創作藝術上有更大空間，將來方向係唔需要荷里活，啲電影拍番畀內地觀眾睇，仲勁過佢，因為人口多過佢。」

談及外國媒體早前大讚甄子丹適合演蝙蝠俠，他說：「佢哋講笑啫！全世界電影市場都係白人主導，將來係有呢個機會，但仲有段要奮鬥嘅路。」他又點名大讚曾傳不和的吳京：「吳京都付出好多年先有今日地位，所以要成功就要付出，唔做就咩都冇。」而他對於連續六年任《寶馬香港打吡大賽》的「打吡大使」感到榮幸，認為參賽良駒與人的經歷相似：「成功嘅人必然要付出同歷練，先有機會去衝線點。我每日拍戲都抱住呢個心態，做到最好。」因拍攝而學識策騎的他，指有時間想真正學習如何控制良駒及將牠變成自己的一部分。

髮型：Kenji Ng＠IL COLPO（PP）

化妝：littlewhite

造型：Harrylam（stylist）

服裝：Maison margiela＠Harvey Nichols

場地：香港賽馬會

文：名人組