洪朝豐復出教打坐笑看明天
患上舌癌及淋巴癌的洪朝豐剛完成電療，昨日受訪時難掩喜悅透露將於本月底復出開班教打坐，積極面對人生。走出陰霾的他更帶記者重遊「斷腸地」，一笑解千愁！
前DJ洪朝豐去年10月經切片檢查後證實患上舌癌，需接受割脷手術保命，但後期發現癌細胞擴散，導致患上淋巴癌。踏上抗癌之路的他先後接受30次電療，現正邁向康復之路，重過新生。
重新學進食
昨日洪朝豐接受家訪，宣布康復喜訊之餘，還大談抗癌經過，見他精神不俗，惟說話還有點口齒不清，但語速正常，他笑言：「有時都唔記得自己係癌症病人，依家過得好開心。」他指現時要重新學習進食，主要食流質食物，之後需定期覆診。
問到如果再有選擇權，當初可會為保靚聲而錯過黃金治療期？洪朝豐即懊惱抱頭，表示不會：「會直接做手術，今次搵咗三個中醫去醫治，但腫瘤就不停咁大，想點保住條脷都保唔到。」又指癌症對他打擊非常大，自爆曾不下十次有自殺念頭，走到住所同層21樓的欄杆邊徘徊生死邊緣，幸好最後被學生「點醒」，他坦言從此不會做傻事：「依家經過（欄杆）都有啲感覺，望落去都會驚，但依家跳番出嚟睇，就覺得根本唔使自殺，死都唔係咁易，如果死唔去仲大鑊。」
洪朝豐指幸好前妻葉桂好在身邊不斷開解他，又感恩她不辭勞苦照顧：「由去年7月佢就喺度住，成日都會上網睇資料研究唔同菜式。」
分享抗癌經歷
他又笑談復出之路，透露將於本月30日首次公開露面：「當日會分享抗癌過程，以過來人身份安慰病患者，之後會再教打坐。」信心滿滿的他更表示日後會繼續教打坐及唱歌，並計劃推出抗癌書及自傳味濃的小說，對將來充滿希望。
文：音樂組
攝：劉斌