杜汶澤燒銀紙力捧貝依霖大膽講性經
藝人杜汶澤即將於網上主持節目大膽談性，並計劃力捧作風大膽的性感美女貝依霖，誓要掀起全城熱話！談到今次投資七位數字，阿澤笑言「預咗燒銀紙」，日前他更飛抵東京「取經」，先後到訪鴨店及性商店拍攝，讓網友大開眼界。
近日再次榮升老闆的阿澤與友人投資百萬港元，於社交網站主持節目，新一代性感美女貝依霖獲「欽點」，稍後二人會合作主持性節目。阿澤日前率先到訪東京，現身鴨店向「鴨王」討教，又到當地性商店參觀。
「笑到抖唔到氣」
據悉，貝依霖愛於社交網站分享性感照，作風大膽。自言思想不算保守的她，談到今次與阿澤合作做節目說：「同佢拍嘢笑到差啲抖唔到氣，佢有好多新奇好玩嘅主意。正如佢所講，我哋有資訊性及性話題嘅節目，而性係正常事，又唔係變態嘢，就算講性玩具我都覺得冇問題，可以接受到。佢暫時都未問到一啲令我好尷尬嘅問題，當然太私人嘅嘢我都唔想分享嘅。」
「我份人比較低俗」
至於阿澤談到轉戰網絡，他不諱言：「其實我之前同幾間電視台合作都好開心，不過我份人比較低俗，想做嘅節目有好多題材都唔適合喺電視播，所以咪把心一橫同朋友夾份搞囉！今次由創作、拍攝到演出可以話我一手包辦，預咗頭一年會燒銀紙，因為收入要靠廣告。我拍電影就會用正經題材，不過喺網就會多啲搞笑。（除咗性節目，預咗網上爆粗？）咁我又唔係着重講粗口嘅，純粹搞笑形式囉！我都怕睇節目係咁用粗口鬧人。」
文：影視組