張敬軒試勻野味吞蜥蜴噴鼻血

張敬軒、單立文與太太胡蓓蔚前晚現身將軍澳電視城，錄影由鄭裕玲及組合農夫主持的節目《Do姐有問題》，大玩有關飲食知識的遊戲。

軒仔目標贏取一萬多元獎金，明言已做好功課：「主要係食嘢，我做餐廳幾個月，都有啲淺層認識，希望問得中，節目入面都有啲試食食材環節。（本身有冇金舌頭？）我唔係食家。」問到可有品嘗過核突的食品？在廣州長大的他笑言「冇乜嘢未試過」：「有親戚做野味，乜嘢動物都有，推過勁大隻嘅蜥蜴出嚟，真係食到流鼻血！（最唔鍾意食乜？）蟲！大個咗對生命價值有認識，已經慢慢轉做素食者，平時食嘢多數食沙律。」又自言年過30後開始有中央肥胖，每當缺少運動就有肚腩仔：「嚟緊演唱會，都要操吓，唔係特登想騷肌，想練好體能，演唱會3月27號會公開發售，暫時反應都樂觀，始終4年冇開騷，想做好啲。」

單立文最叻「食女」

單立文與太太胡蓓蔚孖住受訪，講到節目中要試食，單立文自封食家：「最叻係食咗佢（指着胡蓓蔚）。」胡蓓蔚即笑指他以前食女食得多。講到真正的飲食習慣，單立文自認雜食，以前到台灣工作時，蟲、蚱蜢和蠍子都吃過，並說：「又試過去內地做騷，佢哋當我上賓招呼，枱面冇一樣嘢我嗌得出名，穿山甲、貍貓，冇樣嘢正常，但我肚餓就焗住食，好難啃！」又表示最近與太太齊齊Keep Fit嘗試12日西柚餐，要戒糖和澱粉質，忍不住呻苦：「完全唔掂，個口感覺好寡！（見效未？）又未有喎！」胡蓓蔚即送上鼓勵，讚老公身形已很好，但可更上一層樓。

胡蓓蔚呵番姚子羚

提到好姊妹姚子羚與鄭子邦宣布分手，胡蓓蔚認為毋須刻意安慰，但透露有短訊慰問：「我有問佢Are you OK？佢都有回覆話OK，佢咁大個人，係兩個人嘅決定，外人唔應該講太多。」問到她曾在節目向子羚玩求婚，可覺得玩出火？她表示已是去年的事，並不是她的主意，又坦言今日唔知聽日事。

文：影視組