古巨基包冚扮戰士肌不可失
近年演唱會都掀起一片露肌熱，歌手古巨基為了五月紅館演唱會，也急切展開古太為他收身而設的「番茄」減肥特餐！但基仔卻大唱反調，不但拒絕露肌，甚至穿上盔甲扮卡通戰士，密不透風騎着時光機進紅館開騷。
相隔七年，古巨基將再踏紅館開騷，於5月11日至13日假紅館舉行《古巨基WE世界巡迴演唱會-香港站特別版》，本月19日將進行信用卡優先訂票，基仔更獲主辦單位英皇娛樂揼本造勢，斥資過百萬於紅隧為他買了大型廣告牌宣傳。距離開騷得番兩個月的基仔，自爆在農曆新年放肆地大吃大喝，令體重增磅不少，笑言當務之急是減肥Keep Fit！
交畀Dancers露胸
問到基仔有甚麼減肥秘笈？基仔說：「最近古太要我試番茄減肥法，就係一日三餐都係食番茄炒蛋，或者番茄加滾水蛋。我本身好鍾意食番茄，所以咪試下囉！（減咗幾多磅？）呢個未知，啱啱先開始咗幾日，遲啲先話畀大家知呢個方法得唔得。」
一向「守身如玉」的基仔連短褲都少着，問他減磅收身後可會大膽騷肌？他蠱惑地笑說：「台上露吓胸肌？會呀，諗住叫班Dancers露，我露極都唔會夠佢哋好睇0架啦！我操Fit係為咗着衫靚啲，唔係為咗唔着衫囉，哈哈！」
帶歌迷穿梭時空
基仔構思的演唱會海報近日曝光，化身為時光戰士的基仔，騎上時光戰機，帶歌迷穿梭他的音樂時空。他笑說：「影相件皮衣都特登磨得頗爛，配合番穿梭時空有過好多經歷。」拍攝中途，基仔覺得漫畫人物除了型之外，通常都有搞笑細節，就想到在鼻上貼上膠布：「戰士都係人，都會受傷咁解。」他表示今次開騷會跟歌迷來個集體回憶，大唱經典歌曲：「今次香港站會全部唱晒廣東歌！加上會有3D裸視效果嘅舞台，仲有好多其他嘅驚喜就真係入場你就會知喇！」
文：音樂組