湯洛雯復合無望誠徵完美男友

湯洛雯昨日宣傳無綫新劇《翻生武林》,與羅天宇結束四年情的她坦言復合機會不大,甩拖後希望沉澱一下,暫時未想拍拖,但坦言歡迎追求者,希望找到完美男友。

無綫劇集《翻生武林》演員湯洛雯、蕭正楠、陳凱琳、黃智賢、泰臣、陳婉婷、吳沚默及李天縱等,昨日到馬鞍山宣傳新劇。湯洛雯日前宣布與羅天宇分手,但出席活動時心情不俗,她說:「心情OK,鬆一口氣,都分開咗一段時間。」又力撐好友陳瀅並非第三者。她坦言復合機會不大,因有問題不能解決,即使復合亦沒意思,現時她與羅天宇再見亦是朋友,問到是否已準備好接受新戀情?她說:「未諗拍拖,都拍咗一段時間,想沉澱一下。不過有追求者都無任歡迎,拍拖要了解,需要時間認識。(有咩擇偶條件?)穩重、成熟、細心、有困難可以幫到我,我諗個個女仔都想搵完美男友!」

蕭正楠貪玩扮「射哩」

此外,有網民大讚《翻》劇有當年周星馳作品《蓋世豪俠》影子,蕭正楠說:「幾好呀!《蓋》係神劇,可能好耐冇呢啲江湖惡搞劇,令觀眾開心就好!(挑周星馳機?)點挑呀!星爺係鼻祖,嗰個年代成長嘅,多少都會畀星爺潛移默化。有場扮傻戲我加咗『射哩眼』落去,以為好好玩,點知要連戲,拍到好攰、好後悔!」至於陳凱琳透露日內會起程到橫店拍攝《包青天再起風雲》,蕭正楠問她帶了多少件行李,陳凱琳表示只有一個行李篋,蕭正楠笑說:「曹永廉話要帶三篋上去,一篋護膚奶,又要帶維他命丸等等,今晚收工我要去幫佢執行李,幫佢丟走啲冇用嘅嘢!」

文:影視組