羅仲謙瘋狂操肌
藝人羅仲謙、黃建東與莊思敏昨日到尖沙咀出席慈善活動，羅仲謙明顯操到脹卜卜，十分健碩，他解釋因被老婆楊怡嫌太瘦：「停咗成年冇健身，老婆覺得我太瘦，話攬落去冇咗以前嗰啲感覺！咁我就同佢講話唔好後悔，我一玩健身就會好瘋狂，佢依家就開始投訴我成日下晝唔喺屋企。不過，脹卜卜好有安全感嘅感覺就快返嚟。」
羅仲謙指現時與張繼聰是健身師兄弟，希望有機會拍攝健身旅遊特輯：「大家同一個教練，依家一齊操Fit，睇吓有冇機會去拍個健身嘅旅遊特輯。（唔着衫？）唔會！最多特寫吓啲肌肉，希望可以同其他地方嘅藝人交流吓。（要操幾耐？）今次唔係要操大隻，係要操極致嘅線條，要操到好巔峰，依家完成咗一半。（同張繼聰邊個Fit啲？）佢磅數比我強，我哋互相鼓勵，依家幾乎日日見，同見老婆一樣咁密。」
