王祖藍重感冒照做開籠雀

一連兩場由王祖藍、阮兆祥及李思捷合作的《福祿壽十周年演唱會》前晚假紅磡體育館圓滿結束，尾場捧場嘉賓有張智霖和袁詠儀夫婦、佘詩曼、田蕊妮、趙學而、草蜢以及祖藍公司旗下的羅霖、張彥博等。騷後，祖藍、祥仔及思捷和工作人員食日本菜慶功。

祥仔踢爆祖藍因患上嚴重感冒，之前十分擔心影響演出，幸好最後順利完成，思捷笑說：「佢明明開Show前連嘢都講唔到，但一唱歌就即刻開籠雀咁，真係服咗佢呀！」由於是次演唱會支持「花籃轉化善款行動」，將善款做善事，三子獲頒贈「慈善家」紀念品。