又南揈出男人味 天佑Rock版李小龍上身
組合Shine在紅館演唱會上狂騷苦練五個月的成果，由「排骨仔」變「爆肌男」。黃又南及徐天佑在台上半裸鬥狂揈，男人味四射，連嘉賓許志安也自愧不如，至於閱仔無數的楊千嬅亦讚大開眼界。
Shine前晚假紅館舉行一連兩場《SHINE MOMENTS Live 2018》演唱會的頭場，在觀眾不停嗌「除衫」下，黃又南及徐天佑於跳舞競技環節齊齊除淨條褲，大晒苦練成的鋼條身材。變身「Rock版李小龍」的天佑表演雙節棍，對戰隨着音樂玩雙槓及鋼管舞的又南，又南更單憑臂力在鋼管上凌空轉了六、七圈。其後二人爆笑互寸，天佑笑說：「你係咪驚你老咗之後條腰扭唔郁跳唔到鋼管舞？男人條腰好重要嘅，你冇事嘛？」又南反擊：「你呢，你係咪驚你老咗之後揈唔郁你嗰條……雙節棍？」相當抵死。
發表愛的宣言
天佑在鋼琴前自彈自唱《怎麼捨得你》，向太太發表愛的宣言：「一直以嚟我都好容易唔開心，直至到你嘅出現，同你一齊我係覺得好安心、好踏實，唔知你願唔願意每日擘大眼第一個見到我呢？」又南則以Rock爆造型出場，邊打鼓邊唱《迷幻彩虹》，其後亦藉《陀飛輪》向家人作感性剖白：「近幾年我嘅心態有轉變，因為我爸爸患上腦退化，開始認唔到我同媽媽。有次媽咪打畀我話爸爸唔見咗，嗰幾日我哋通宵咁搵，好彩搵得番佢，令我明白有啲嘢唔使咁執着，最緊要係珍惜屋企人喺身邊嘅日子。」
千嬅：大開眼界
早前患乙型流感入院的許志安擔任表演嘉賓，他笑言見到二人操成「肌男」，本想除衫也要縮沙，期間三人又互寸「聽住你啲歌長大」，笑大家年資深。之後到楊千嬅出現，即打趣跟又南說：「真係令我大開眼界，估唔到男人都可以跳鋼管舞，其實男人跳呢啲會唔會有啲位置唔方便呢？」Shine最後唱《十八相送》時感觸落淚，不時掩面望天，天佑更一度踎低，觀眾紛紛大叫：「唔好喊！」
文：音樂組