關楚耀約LuLu搓湯圓慶元宵

趁住元宵到來,歌手關楚耀(Kelvin)約埋師妹董嘉儀(LuLu)一起整花生湯圓,扮演一日情侶,煙韌共度中國情人節!兩人平日都愛下廚,但首次搓湯圓的Kelvin明顯論盡,要由LuLu悉心教導。煮完湯圓後,兩人入戲Sweet餵對方,又派給同事品嘗,Kelvin餵女同事食時更令對方冧爆!

大讚入得廚房又細心

Kelvin大讚整湯圓好玩:「最緊要唔好心急,好似感情一樣,要慢慢嚟,唔係就會散,最緊要啱Feel。」Kelvin又大讚LuLu細心,有女友Feel,LuLu就讚Kelvin影相靚。兩人認為情侶間煮飯仔可以增進感情,不用常常都是行街睇戲。

提到Kelvin現時單身,問到揀女友可會希望對方入得廚房、出得廳堂?他表示:「唔好話揀,係要大家碰到啱嘅,不過都唔使特別識煮嘢食,係合眼緣,啱感覺最緊要。(有咩特質可以令你加分?)細心,同埋做我哋呢行時間未必好穩定,希望呢一方面可以體諒到。」

至於LuLu就有個拍拖8年的男友,Kelvin忍不住向她請教維繫感情的方法,對此LuLu說:「我哋唔係成日二人世界,因為唔想話題都係關於工作上嘅壓力,所以我哋成日都會搵朋友食飯同玩,旅行都一大班人,情人節都係Group埋啲Couple或單身朋友一齊食飯。」問到可有結婚計劃?她自言現時仍年輕,還有好幾年時間。

文:音樂組 

攝:張福宏

關楚耀髮型:Ian Wong@II Salon

化妝:Hetty Kwong