張敬軒赤裸上身頭頂 BBQ
歌手張敬軒為了宣傳6月的紅館騷，可以去到幾盡？就是拎自己個頭教飛，將人頭變做爐頭玩噴火，任由工作人員在頭頂BBQ燒雞翼。軒仔更在7度嚴寒下赤裸上身拍攝，實行冰火交融，難怪他不禁大叫：「正！」
張敬軒今年6月15日起再踏紅館，舉行一連三場《HinsIDEOUT 2018張敬軒bb演唱會》，獲英皇娛樂耗資過百萬宣傳費造勢，巨型紅隧廣告板日前已率先曝光。而軒仔為個唱拍攝的宣傳海報花絮片段更被網民瘋狂洗版，皆因片中有火燒頭表演！髮型師好認真地在軒仔的頭上噴火，現場工作人員則拎住燒烤叉，在軒仔頭上燒棉花糖、雞翼，場面爆笑，期間更有雞油滴落軒仔額頭。
印度至Hit頭髮護理
軒仔的火頭原來是一種火燄護理，令一些乾燥、受損、髮尾開叉及較弱的秀髮經燃燒後自然脫落，做完護理後頭髮會更豐盈及有彈性。看似鎮定的軒仔坦言事前有少少驚：「不過已經有好多幕後人員試咗都安全無事，同埋呢個護理嘅印度主理人咁啱喺香港，佢都有嚟幫手，成個過程係好有趣、好刺激，好正！」軒仔笑言做完護理後，秀髮又令又順滑，不過就溫馨提示大家，這個護理需由專人指導處理，千祈唔好亂學！
7度嚴寒下除衫
雖然頭上的火燒到「冚冚聲」，但其實拍攝當日氣溫只得七度，但軒仔卻要除晒衫，他說：「真係玩住冰火咁影，嗰日凍到飛起，所以行到邊都要拖住個暖風機。今次演唱會主題叫『Hinsideout』，希望將大家喺螢幕外見唔到嘅我、最深入嘅性格特質變成音樂，帶上舞台畀大家睇，所以我連衫都冇着o架，個頭頂又起晒火，火嘅意思係我將心裏面團火都燒埋出嚟。」相隔四年再踏紅館開個唱，軒仔坦言最難是突破上次的演唱會：「上次既有譚玉瑛姐姐，又有性感嘅關淑怡互動，一眨眼就四年，今次做乜嘢好呢？我會揀好多自己同大家鍾意嘅作品，用唔同形式演繹出嚟。」
文：音樂組