陳松伶反串呻「鬚」Bad！
陳松伶、黃智賢、陳煒及準新人陳榮峻與吳香倫等，昨日出席無綫新劇《危城First Lady》拜神儀式。以差利卓別靈造型反串男裝的松松成焦點，但被嘴唇上的一片假鬚搞到不自然，全程說話也不敢張開嘴巴，場面惹笑。
扮「福爾摩斯」感困惑
松松透露故事圍繞20、30年代，當中不乏靚衫靚裙造型，亦有反串打扮：「今日個造型係參照差利卓別靈，戲入面我係『女版福爾摩斯』，成日都破案，但從來冇做過呢啲角色，好多對白要背！之前《全職沒女》開工覺得好玩，今次就覺得嚴重困惑，唔知點先做得更加好。」談到首次黐鬚，松松直言不太好受：「講對白十分唔慣，啲鬚好硬！我諗要黐埋返屋企練習。」黃智賢則表示與松松繼多年前的兒童節目《閃電傳真機》後再合作，感覺得意。戲中演黃智賢初戀情人的陳煒透露最近劇接劇，嚴重睡眠不足，結果新年三日假期全程瞓覺叉電。
至於陳榮峻將於4月入紙申請註冊，7月10日在教堂行禮，晚上於酒樓擺逾三十圍酒，笑指屆時不會有接新娘及玩新郎環節。
文：影視組