林作母子假證遊北韓險被扣留

向來言行出位的前大律師林作又語出驚人，繼早前踢爆母親因周轉不靈而要賣樓套現後，昨日又在社交網站爆阿媽大鑊！他透露當年母親帶同就讀小學的他到北韓，最爆的是林母靠關係以假身份入境，度過了林作形容為「人生最黑暗的一日」。他憶述在當地買的汽水過期兩年，而且酒店床單有血漬似乎死過人，林母要求換酒店，卻換來導遊一句：「你今晚唔留喺度住嘅話，聽日有可能會被扣留！」

即晚想走畀「便衣警」兇

記者昨日致電林作，他坦言現時回想也覺得驚驚，問到林母如何取得假身份？他說：「媽咪有個內地朋友，畀咗個臨時中國證件我哋。（係咪畀錢搞？）係媽媽朋友送嘅，大約發生喺2000年左右，我嗰陣約11歲，當時未去英國。嗰陣我真心覺得會被扣留，因為我哋基本上唔願意留低，當晚就想走，但佢哋唔畀，我哋話換間正常酒店都唔畀？僵持不下，然後佢兇我哋！我覺得我哋會玩完，尤其係身份係假嘅。（有咩人去？）一啲內地官員嘅配偶親戚。（邊個唔畀你哋走？）導遊！但係並非一個人，仲有啲便衣警員類嘅人。」

阿媽愛追尋刺激

問到為何如此大膽，林作指母親自細已瘋狂，覺得人生就是要追尋刺激，不過，林母對當日所作所為也感過意不去：「佢之後從未再提過，我咁大個人，佢都基本上冇再叫我去旅行，全家新年遊除外。（驚唔驚爆出嚟對媽咪及其他人有影響？）咁多年喇！驚咩！」

文：名人組