吳業坤踢爆：好事近啦！

傳緋聞的歌手胡鴻鈞（Hubert）與許廷鏗（Alfred）近日被踢爆在農曆新年假期一同去冰島睇北極光，展開「神奇之旅」﹗二人先後「巧合」地上載多張背景相似的獨照疑似避嫌，但仍逃不過一眾眼利網民的法眼，隨即引來熱烈討論要求解釋，令這段「HeHe情」升溫！直至昨日Alfred不敵「追殺」，主動將「蜜月照」曝光，直接承認同遊，不過為免緋聞太高調，就上載一張多了三個「電燈膽」的五人合照，且是超遠距離拍攝，未能看清兩人是否企在一起，Alfred並為事件解畫，Hashtag「年年都呢個時間都一班人去旅行o架喇」及「一班人開開心心環冰島」，否認度蜜月，又笑言Hubert現是唱片公司一哥不易合照，更預告去到旅程的第二站會開Live還網民心願。

「我係伴郎啫」

早前Alfred出席活動時，已預告假期會歐遊，但就沒透露同行人士，當時他更留下伏線，笑言若在外地碰見Hubert的話，會約食飯兼自拍甫上網，現在可算是兌現承諾，做「找數」真漢子！其實同為「巨聲幫」的二人自8年前參加歌唱比賽入行後，已屢傳緋聞，而這段「HeHe情」引發的導火線就可追溯至去年11月，Hubert當外賣仔深宵送餐到Alfred家，進入屋苑大閘時隨手撳密碼直入，可見關係非淺。

胡鴻鈞	許廷鏗「找數」貼出與胡鴻鈞的合照，但細到粒骰咁嘅？	吳若希搞笑話有她一齊去才是蜜月。

兩人的老友吳業坤昨日出席電台節目時，談及此事即醋爆說：「都係睇相先知，睇嚟都係一齊去，好事近啦！（你會唔會好妒忌？）呷醋囉！（本來都有份去係主角？）唔係，伴郎啫！」更抵死地說之後會向二人求證。事後Hubert則透過短訊回應，他笑說：「佢（吳業坤）就好事近！」

吳業坤醋意大發指許廷鏗與胡鴻鈞好事近！

吳業坤識做派利是給關心妍的寶貝女。

吳若希：諗多咗

至於早前揚言懷疑Alfred及Hubert有超乎友誼關係的吳若希，昨日在活動上反而為兩人澄清：「我知道佢哋原本一班人去，而Hubert係自己去，Alfred係成班人一齊嘅， 所以你哋係諗多咗啦！佢哋係好好朋友，唔係蜜月，有我一齊去先係蜜月。」

另外，吳業坤和所屬的星娛樂歌手包括關心妍、石詠莉等出席新春團拜，向唱片公司執行董事Tommy Chu拜年外，坤坤更派利是給關心妍再送贈給其囡囡楊榮心。

文：音樂組