任達華劉嘉玲幫衛詩雅招親
任達華、劉嘉玲和衛詩雅現身花市宣傳新戲，任達華即場推介方力申給單身的衛詩雅，嘉玲更邀她到家中「捐」桃花。晚上三人再出席首映禮，有份參演的視后唐詩詠以一身吊帶裙亮相，更獲一班同事前來撐場。
藝人任達華、劉嘉玲和衛詩雅昨日到花市為英皇新片《我的情敵女婿》宣傳，晚上三人與唐詩詠、王菀之等再出席首映禮，老闆楊受成更與太太及謝賢撐場，視后詩詠以一身吊帶裙示人。首映禮現場如花市般熱鬧，有不少扭波、求籤等攤位，又有舞獅打鑼打鼓助興。
忘記送花畀琦琦
適逢昨日是情人節，嘉玲表示因工作無法與老公梁朝偉慶祝，惟有返屋企開香檳補數。任達華則自爆忘記訂花送給太太琦琦，他說：「唔記得咗買花，大劑啦！後來琦琦拎花畀我，我真係冇面！（補鑊？）偷吻一次囉！平時好浪漫o架嘛！」
單身的衛詩雅則獲任達華為她找男友，首要條件是懂得游水，任達華大讚方力申，指可以與她邊拍拖邊游水。嘉玲則提議衛詩雅到她家中拜年：「嚟捐吓桃花，萬試萬靈o架！」衛詩雅尷尬笑指全香港人都在幫她招親。被問是否要買桃花？她笑謂：「要偷o架！偷一粒然後入利是封，擺喺枕頭底，就會有桃花！不過我未偷過！」
唐詩詠「小三遠離」
唐詩詠透露無綫高層樂易玲帶一班同事捧她場，問有否洪永城？她說：「其實唔係我約嘅，但知冇佢。（請佢睇番？）唔係喇！叫佢自己買飛睇幾次，我冇時間同佢睇，係好朋友就買多幾次飛睇！」而布景板上的詩詠手拿「小三遠離」的大揮春，問是否其新年願望，她說：「我影時冇呢樣嘢，係佢哋加畀我。」王菀之則「放閃」指收到老公的心心花。
文：影視組