家傳絕學摸盡馬國明

個市一大堆偽男神，舢舨充炮艇，揀仔要知碇，女人至怕揀咗個爛燈盞。心穎BB完全冇鬼揞眼，一睇就知邊個爛，未入行前已經講到明係馬國明嘅忠心粉絲，「少女的祈禱」終於有回報，直頭畀佢嗒到馬國明，偶像變男友。

出身於中醫世家、老竇係著名中醫師黃沛霖，雖然屋企有四朵金花，但未有承繼父業，心穎耳濡目染點都有三斤釘，就算唔識把脈執藥，最少都識點樣以「望聞問切」嚟觀人於微。憑內置一副「華陀扁鵲」級Sensor，一見馬國明真人，骨骼精奇，天然呆得嚟穩重又孝順，面色紅潤血氣夠行，愈做愈紅，再嚟個對症下藥，知己知彼，投其所好，得咗！

畀佢執劑清晒個底

封咗個筍盤都未算，心穎BB啲是非仲一筆清，乜底都洗到白晒！六年前選港姐，佢堅係步步驚心，除咗爛蒲爛玩專攻富二代，又話佢放料攻擊對手，嘩！單單都咁杰，是但中一樣，想入三甲？凍過水啦！好在佢有個中醫底夠硬淨，最終入到三甲。選完出嚟，都仲未得到班網民歡心，瘋狂笑佢嚟自非洲同菲律賓，話佢唔係非洲黑人就係菲傭，仲話佢同蔡一智係失散兄妹，幫佢改名換姓做「蔡一穎」，就連蔡一智都忍唔住叫佢做阿妹！選完同班姐仔一齊主持《學是學非》，快過搭高鐵，冇幾耐就有劇拍，之後仲被傳同人夫男星吳啟華同王浩信拍劇撻着，好在佢份人樂觀硬淨，見親佢都係笑到見牙唔見眼就知啦，EQ、IQ乜都高，面對傳聞或網民批評都只係笑吓就算。直至遇上馬國明呢盎大補藥咁，執一劑，搞掂晒，將心穎漂白，成為又Pure又True嘅BB！

貪夠「寒」榨極唔乾

雖然近排又話佢玩富貴歐遊掃貨「榨乾」馬國明，查實你估佢個底少嘢，舊年先至入行五年，已經上車買層850萬嘅樓，話明100%自己供，乜人都唔使靠！相比由路人甲開始捱上去嘅馬國明，直到前年入咗行17年，先至儲夠錢買個約2千萬嘅太古城複式連天台千呎單位！況且馬國明出名「寒底」慳家，出動含笑半步釘或七步迷暈丹都搞佢唔掂，心穎BB就係貪佢夠「寒」夠踏實唔大花筒，榨乾？唔係啩！

相傳被喻為中藥三寶之一嘅麝香，具開竅醒神，活血止痛功效，以前仲係成班後宮娘娘最強嘅爭寵法寶，心穎明顯有麝自然香，好男人自然走埋嚟！仲識得幫老竇搵個傳人，話晒馬國明當年喺《On Call 36小時》飾演醫生「一件頭」上晒位，雖然係拍劇咁拍，不過有未來外父指點，分分鐘威水過做戲，就算提名咗11次攞唔到視帝，都冇所謂啦！