火火唔想要BB 同老婆吵大鑊

火火被細So以「壞人」形容，揶揄他有多個「私生子」，火火不但未有介意，更開玩笑說：「我係有8個老婆嘅火火，香港應該有14個仔女，泰國嗰邊有百零個！」他又在節目中親揭不為人知的另一面，育有一女一子的他自爆當年老婆意外懷孕，嚇到他不懂反應！他自嘲30歲前不是好人：「坦白講，識佢嗰陣時諗住多個女朋友。」兩人拍拖初期好快「意外」有BB，他十分記得到診所時，戴口罩亦難掩黑面，當證實太太懷孕，兩人離開診所時在彌敦道吵大鑊！他說：「梗係佢吵我，佢話你唔好畀個咁嘅樣我睇，你唔想（生）就話畀我聽。」

BB健康 淚灑當場

火火的老婆因遺傳基因問題，可能影響小朋友，只得兩成機會生到健康的BB，當聽到醫生證實BB完全健康，「麻甩佬」的火火竟然淚灑當場，由不想接受小生命到期待女兒來臨。甫出診所，他即載太太飛車到尖沙咀購買全港最貴的BB衫，從此對愛情、親情都負上最重要的責任：「到依家我都係學緊做一個爸爸。」

火火直言是呷醋外父，將來女兒拍拖，必定搵「未來女婿」講數。	柳俊江笑言湊細路唔難，最難反而是氹老婆。	火火因工作關係，經常與靚女合作，但婚後已修心養性，沒有傳出緋聞。

火火的女兒天天今年6歲，他笑言預了女兒將來畀男仔呃：「我只能盡量控制條茂利似樣啲。」

最搞笑是陳詠謙一臉尷尬指男仔總是佔女仔便宜，火火即笑住踢爆：「做咩咁尷尬啫？我哋唔係咁嘅人咩？你呢啲才子，咪唐伯虎，咪扮晒嘢！」火火坦言會在女兒後面鋪定安全墊，等她跌下時不會太傷，甚至私下搵男仔講數！他還教路湊仔第一貼士：「要尊重仔女，不動聲色喺後面幫佢。」最後他真情剖白，過去這麼多年他都很少跟子女一齊睡覺，覺得好內疚：「好後悔犯咗男人嘅死罪，曾經問過老婆，你平時喺屋企做咩？依家先知全職媽媽唔易做。」所以他應承老婆會錫晒家人。

「工作狂」火火幾忙都好，會盡量抽時間與子女玩樂。

放大圖片

柳俊江撼頭埋牆

除了火火，嘉賓還有曾是新聞主播的柳俊江，在大家眼中能人所不能的他坦言做了父親後，會有撼頭埋牆的時候：「因為唔想掟嘢，唔想當面發老婆脾氣，惟有自己撞牆。」他覺得最大挑戰不是學湊小朋友，反而安撫及照顧老婆的情緒最重要，所以他會盡量氹老婆，以免情緒影響工作後互相怪責。他於節目中「自毀」穩重形象，自爆小時候做過壞學生，連續一年欠交功課及冒家人簽名。

文：音樂組