黃智雯在新劇中患上多重人格，分別與袁偉豪、陳智燊及郭子豪有三段感情，笑言難得有機會展現狂野一面。而袁偉豪更會周旋於黃智雯三個人格之間，為協助她保守秘密，不惜假裝「HeHe」扮戀郭子豪。

由黃智雯（Mandy）、袁偉豪、孫慧雪、陳智燊與郭子豪等主演的新劇《三個女人一個「因」》，將於周日（18日）晚上八時三十分起，每星期連播兩集。監製潘嘉德指Mandy今次挑戰演出「三面夏娃」，在劇中因多重人格而成為三個角色，分別有正經律師、狂野烈女與「愁擘擘」，三個人格互相對立，更分別與三位型男有感情線。

Mandy坦言今次演出被監製「考牌」，她說：「睇咗好多多重人格個案同資料，用咗好多心機，自己有設計小動作，例如狂野嗰個係唔戴Bra、仲係暴力狂，一轉換過去就會大嗌想除Bra！（最鍾意邊個人格？）因為自己少演呢類狂野角色，同我自己好大對比，呢類角色可以好Freestyle咁去做，感覺似跳舞時嘅自己，特別有信心同能量，所以最鍾意。（演到精神分裂？）有一場戲係三個人格講數，我要對住塊鏡不停轉換人格，呢場係演到最分裂。」

而與Mandy青梅竹馬的袁偉豪，握有她患上多重人格的秘密，藉此要挾對方擔任其師傅，以完成見習律師訓練。另一方面，他亦化身「暖男」為Mandy掩飾患病真相，甚至不惜出賣肉體與郭子豪扮「HeHe」。他更與三個人格建立出不同關係，同時是Mandy的徒弟、「愁擘擘」的暗戀對象以及狂野烈女的玩物！

文：影視組