廖碧兒等人約過節國籍不拘!
藝人廖碧兒單身多時，昨日出席劇集活動時表示今日情人節要搞活動，但講到明恨有人約，兼且國籍不拘！同場的羅仲謙則已準備好禮物給太太楊怡，直言男人唔可以偷懶，認真是暖男。
羅仲謙、廖碧兒、蘇麗珊、梁靖琪及朱鑑然昨日到兒童競技室內運動場宣傳劇集《無間道》，被安排坐滑索及玩踏板車，場面熱鬧。廖碧兒透露情人節會舉行玫瑰酒活動，跟一Pair Pair情侶過，問當中可有追求者？她說：「唔知，佢哋唔係直接向我報名，但唔知會唔會有啲報兩個人，但其實得個男士嚟呢？」又坦言情人節沒人約：「有好多朋友都未知我返咗香港，咁單身女仔邊個唔想人約？我都有一直認識新朋友，但因為成日離開香港飛嚟飛去，冇機會深入認識，新一年會多啲時間喺香港。（介唔介意男友係其他國籍？）冇所謂，當然識中文或者英文會好啲，如果其他語言嘅，就我去學囉！」
羅仲謙包場睇戲
謙仔直言喜歡小朋友，已經想好將來負責跟仔女玩，太太楊怡則負責教育。他又指很欣賞鄰居陳豪的大仔，大讚他有修養禮貌又不失童真：「值得參考佢教小朋友嘅方法，快樂得嚟冇乜壓力，喺香港教小朋友要取得平衡。」講到情人節，謙仔表示會包場睇戲，請一眾朋友及Fans欣賞他有份演出的《西遊記女兒國》，問豈不是沒有二人世界？他說：「我同阿怡都鍾意熱鬧，日日都可以係情人節。（會送禮物？）當然，唔可以偷懶！女士好記得你幾時冇幫佢慶祝！（咁送咩？）秘密！（送個BB？）我啱啱由上海返香港，呢兩個月會留喺香港，我要調理吓身體先，食番多啲住家飯！（係咪狗年目標？）都係，但唔強求，唔想有壓力。」
蘇麗珊預一百萬首期
此外，蘇麗珊對於被指到土瓜灣睇新樓盤，她表示最終因籌號太後而抽不到，講到首期預算，她說：「一百萬，唔係我畀晒，屋企人有幫手。（目標買咩樓？）兩房單位，700至800萬。（同男友住？）冇咁快，係媽咪有時唔喺香港，返到嚟可以住吓。」
文：影視組