驚喜情人節 龐卓欣測謊機試男友真心
前港姐龐卓欣（Ada）與「鐘錶大王」孫秉樞孫仔孫智威（Solomon）日前到主題公園拖手仔兼玩掟波波，Solomon為女友贏得大公仔，Ada即時送上愛的抱抱及錫錫，閃爆途人。Solomon自爆Ada曾在情人節送他測謊機測試其真心，幸好成功過關，避過分手危機。
Ada與Solomon相戀4年多，日前他們到主題公園拍拖，更童心未泯玩掟波波，Solomon贏得大公仔，獲女友攬錫作獎勵。今天情人節，Ada指男友要返工，只會簡單食飯慶祝，Solomon說：「唔去太多人嘅地方，二人世界。（有冇準備禮物？）有驚喜。」他猶記得有年情人節，Ada送他測謊機，令他一額汗：「第一句就問你愛唔愛我，綠色燈代表講真話，紅色燈代表講大話，好在着咗綠燈，所以冇事，否則就分咗手！」
願為對方改變
雖然Solomon常被女友批評破壞浪漫，但他卻是個百分百好男友，Ada亦讚相處愈久，愈發覺對方的好：「以前嘅男友一開始對我好好，但愈來愈Hea，佢就好唔同，我係佢第一個女朋友，以前佢唔係好識做，依家對我愈來愈關心，大家比以前更Sweet。」Solomon坦言拍拖首年是異地戀，兩人時有爭執，甚至想過分手，但時間令彼此慢慢為對方改變。
31歲就唔生
Solomon大讚女友值101分，互相視對方為結婚對象，但Ada認為大家的事業剛起步，暫以事業為重，不過，他們已有結婚時間表，Ada說：「我有冇小朋友都冇所謂，但佢想要，我同佢講我31歲就唔生，叫佢自己計掂條數。」另外，Ada昨日在社交網上載身穿低胸晚裝、大晒4吋事業線及白滑長腿的惹火自拍照，不少網友大讚她樣靚身材正。
文：名人組
場地：海洋公園