林作放狗招桃花 見女就撲
明日就是年廿八洗邋遢的日子，前大律師林作提早為愛犬Aldo洗白白迎狗年。林作踩愛犬追狗女唔理好醜，他則只會追靚女，坦言樂於做她們的「觀音兵」，曾與十優港姐麥明詩拍拖的他，揚言不敢再追圈中人。
林作的愛犬Aldo狗毛長又亂，與林作的亂髮頗為相似。為迎接年廿八洗邋遢，林作決定為Aldo洗白白，希望Aldo會帶挈他認識更多女狗主，他說：「放狗可以同啲狗主交流吓，Aldo為自己搵到好多女主人，佢每次喺街見到其他狗女同女狗主都會撲埋去，完全唔理質量，只理數量！呢個特徵同我完全相反，我係重質量，唔計數量。」
樂於做兵「攞籌」
問到擇偶條件，他講明要靚女，亦歡迎港女，揚言不介意做兵侍候「娘娘」：「做兵係我特長，但係都要得我歡喜。我唔介意做兵，因為係『入場券』，唔好一開始就展開猛烈追求。（做過幾次兵？）幾乎唔同時刻都做緊幾個軍隊嘅兵，因為依家競爭大，好多時都要排隊，當拎定籌，我時間都多，做兵幾啱我。」又坦言現時都有做兵，但並非侍候圈內的娘娘。
唔敢再掂圈中人
他自言不敢再與圈內女仔發展，以免再搞到人：「好多女仔同我講，只要同我扯上關係，呢個世界對佢嚟講從此係黑白，行情會差好遠，好似樂觀嘅人覺得一個杯仲有半杯水剩低，悲觀嘅人覺得淨係得番半杯水都冇，呢個同女仔心態一樣。我係樂觀，因為我存在，令其他男仔覺得一定被比下去，所以就放棄；悲觀睇法係，男仔覺得我掂過嘅唔慌係好嘢，都係敬而遠之。」問到狗年願望，他表示不是拍拖及成家立室，而是想事業有突破：「搵唔到錢，再係咁我年尾就宣布下海，乜都會做！」
文：名人組