廖子妤發高燒窮到唔敢睇醫生
馬來西亞女星廖子妤離鄉別井來港發展6年，初來甫到的她每星期僅得400元生活費，發高燒都不敢看醫生，每日靠下午茶餐、泡麵加白飯「醫肚」，但她完全不覺得慘，還自覺很幸福。
由馬來西亞來港發展兼住滿6年的廖子妤（Fish），日內返回家鄉過年。她指當地有「撈生」習俗：「即係香港人叫嘅『撈起』，我都要返去撈個起。」去年她覺得很幸運，一口氣連接5部電影：「雖然其中三部係客串，但多咗人識我，希望今年乘住上年嘅好運，有更多機會。」Fish坦言工作增多，經濟收入好轉，對比初來港時，每餐飯都要計到盡，連病都因為冇錢而不敢睇醫生。
下午茶分兩餐食
Fish憶述當時發高燒情況：「公司都有叫我睇醫生嘅，但我真係驚貴，因為冇乜錢。嗰時我有帶啲成藥嚟香港，既然我都冇工開，覺得瞓覺休息足夠就會好，因為人係有自愈能力，咁咪落街買好多支水同乾糧，係咁飲水、食藥再瞓覺。」連發3日高燒的她坦言辛苦：「因為一直發燒，除咗全身燒又會骨痛，我都要食飯，惟有爬落去買，自己又唔想欠人哋嘢，有咩問題都自己解決，嗰段時間係比較難捱。」
除了無錢睇病，她坦言每餐飯都要計住：「啱啱嚟香港時，每星期只可以攞一次預支嘅400蚊生活費，因為係合約寫明。最窮困嗰次，去到星期五先發現得廿蚊，公司星期六、日又唔開，平日冇工開嘅日子，我都係瞓到好晏，趕喺黃昏前飛落去快餐店買下午茶餐分兩餐，晚飯食一半，第二朝加水變粥再食。其他日子就食泡麵，我屋企有包米，煲咗飯再加落個麵度就變咗泡飯麵。」
「我一啲都唔慘」
這段艱難日子，Fish捱足兩年，但她強調：「我一啲都唔慘，其實我覺得我好幸福，我都未賺錢，就唔好使咁多錢，有過呢啲日子我依家係特別珍惜，我幾開心o架。」
文：音樂組
攝：吳文聰