林聞恩坐定定等老公餵飽
藝人林聞恩近日奉旨與老公邊煮飯仔邊晒恩愛，她說：「雖然我識煮，但我平時係唔煮嘢食嘅，因為我老公煮得實在太好，中、西、日多國不同菜式佢都識整，成個廚師咁勁，而我就係整個意粉都整成個晏晝嗰種，為咗唔好喺我手上糟蹋咗啲食物，加上我老公成日笑我，所以我嬲嬲呀，畀晒佢煮！」她強調並非只負責食，笑言有幫手洗碗。
林聞恩透露妹妹林熹瞳的製作公司近排想她與老公在網上展示廚藝：「於是促成咗我同老公一齊喺鏡頭前煮飯仔呢個Idea，我都游說咗好耐，老公先肯應承一齊煮，我想大家都試到佢手勢，因為我一個人覺得好食係唔夠開心，同大家分享先最開心！奉旨拍住拖咁嚟拍攝係好正，希望遲啲可以拍住拖咁拍旅遊節目就更Good！」