石詠莉為老公甘做「煮飯婆」
去年底剛做了人妻的石詠莉（Sukie），曾有堅定的信念，深信自己將來是個女強人，拒入廚房做「煮飯婆」，直至遇上老公鄧健泓，才體會到為愛的人，心甘情願去付出。
榮升「鄧太」的石詠莉，為東網巨星節目「海馬牌床褥特約」《閨蜜睡房》擔任嘉賓，跟主持人李惠儀（Kiwi）暢談與老公鄧健泓（Patrick）的甜蜜戀事，婚後還未習慣被稱呼她「鄧太」的她笑說：「得閒叫多啲我，可能我會快啲習慣。」Sukie表示婚前婚後最大分別是多了一份使命感：「做咗人太太最緊要照顧好另一半同清潔家居，個人希望除咗工作上，廚藝都會有進步。」
諗住係「無飯煮婦」
在未認識Patrick前，Sukie一直有個堅定信念，將來一定是「無飯主婦」：「我係朝住女強人嘅方向，所以喺識Patrick時，我完全唔識煮飯，以前亦一定唔會入廚房，但後來知道Patrick好鍾意煮嘢食、同食住家飯，既然佢都識煮，咁不如自己都行出呢一步，原來當你遇到一個啱嘅人嘅時候，就好想為佢付出。」
擔心BB似舅父
Sukie跟老公都是音樂發燒友，連當日婚禮編排座位表也用歌名代替，非常有心思，Sukie說：「我覺得婚禮用心經營比用錢去堆砌重要。」談到生BB問題，她表示順其自然，他們並不心急：「Patrick有個外甥仔，我都會幻想將來有小朋友會點，我同哥哥個樣完全唔同，佢天生好黑、偏肥，有對細小腰果眼，啲人成日話外甥多似舅，如果將來小朋友似佢點算！」想知道更多Sukie與Patrick的秘密，記得今個星期五、六、日收看《閨蜜睡房》喇！
文：音樂組