汪明荃要緩衝拍劇諗諗先
藝人汪明荃（Liza）將於大年初三與鄭少秋組成「黃金組合」，為賽馬會「農曆新年賽馬日」擔任表演嘉賓。她坦言與秋官合作無間，默契十足，早已視對方為家人。
Liza過去一年工作忙碌，希望今年上半年可以做較輕鬆的工作，趁機充電，5月底則會與香港中樂團合作開騷。問到會否再拍劇？她直言要考慮：「始終體力有限。」問到老公羅家英可會事事聽從其意見？她說：「當然唔會，大家朋友唔同，佢仲多嘢做過我！因為我都好揀擇。（唔聽你講會嗌交？）一定會，但有啲相處方法嘅，大家識咗幾十年。」
從小被灌輸要打扮莊嚴才代表專業的Liza，近年一改形象，大打親民牌，兼在社交網晒街坊裝，她笑言由始至終都堅持要靚！問到可有收藏首飾？她說：「大家都知我屋企畀賊入過幾次，貴重嘢都冇咗，不過依家覺得唔需要再買，幾千萬首飾都係用嚟襯衫，但會保留媽媽畀嘅首飾，喺啲重要時刻拎出嚟戴。」