梁漢文「守行為」唔揸車做伸手黨
歌手梁漢文（Edmond）早前涉醉駕被捕，潛水多時的他日前終於出關現身中環，太太林文慧（Karen）更陪出陪入(目及)到實。出事後的Edmond當然乖乖「守行為」，當日「自動停牌」有車都唔敢揸，乘的士代步，期間見他冇厘心機頭耷耷，全程愁爆。
早前梁漢文駕駛平治房車在中半山失事自炒，掃毀鐵欄及剷上石壆，接受酒精呼氣測試證實其體內酒精含量超標3.5倍，涉嫌酒後駕駛被警方拘捕帶署。事後Edmond對醉駕過失表示真誠悔疚，又向各界鄭重道歉，承諾會深切反省。
「自動停牌」轉打的
出事後一直未曾露面的他，潛水多時終於現身！愛夫心切的Karen有難同當，時刻陪伴左右時行(目及)到實，難怪Edmond乖乖聽話「自動停牌」，出入亦只坐的士。當日下午四時許，戴帽的Edmond與太太現身半山羅便臣道寓所截的士，由於當時寒風凜凜，體貼的Edmond吩咐太太躲於一旁避風，他截到的士後才叫太太上車，兩人及後直駛中環，下車後步往電話舖，見他們向職員詢問一輪又離開，步入附近商場時，Edmond更手指指為太太帶路，其後前往另一電話舖，Edmond還拿出手提電腦與店員研究一番，逗留約半小時才離開。
頭耷耷唔想被認出
兩夫婦於商場閒逛，但見Edmond不時頭耷耷又拉低帽子，不欲被人認出，就連到時裝店揀衫都冇厘心機，轉了一圈便空手走人，與太太前往附近餐廳醫肚，Edmond揀選背對門口的位置坐，見他與太太傾談時亦毫無笑容，顯得心事重重。離開時，他見記者在場即一臉愕然，問到戒酒未？他未有回答。至於太太是否很擔心？他即說：「多謝關心。（係咪搵咗律師？）處理緊。（仲有冇揸車？）梗係冇啦！」問及可擔心面臨被判刑？他未有回答，只叫正在落扶手電梯的記者小心，並急急腳與太太乘的士返歸。
文、攝：追蹤組