32歲歌手雨僑和31歲羅力威拍拖7年，昨日終於公布喜訊，宣布將於3月31日在淺水灣結婚！雨僑大讚羅力威風趣幽默，求婚當日雖然沒有跪地送花，她仍然爆喊應承，直言找到對的人，果然是真愛呀！

羅力威曾表示早已向女友雨僑求婚成功，昨日二人各自在社交平台上載婚照及「愛的留言」。雨僑感謝對方照顧：「這些年來你讓我放膽往前衝，給我無限的支持和鼓勵，回頭看原來你每次都在後面收拾爛攤子，我的路才走得這麼輕鬆。感謝主安排我們遇上，讓你填補我的不足，我希望餘生都能和你牽着手一起過，一起變老，一起走到最後，一同經歷生命的豐盛。」阿威則留言指很奇妙找到一個很合拍和不計較的人，揚言大概從此就不會分開：「我們要結婚了，喜歡雨僑的靚仔們千萬別憎惡我，喜歡我的美女們也請不要討厭她，因為人類都應該相親相愛。我愛你們，我愛你雨僑。」其實去年二人曾飛到日本沖繩，希望在當地教堂行禮，但最終選擇留港註冊。

雨僑透露3月31日會在淺水灣舉行西式婚禮，下午聚餐，晚上與雙方家人吃飯，不會有接新娘環節。她笑言不記得拍拖多久，只記得有一年大家找對方做音樂會嘉賓後開始拍拖，二人就像普通情侶一樣：「咁多年入面係冇壓力嘅。（男友為人較悶？）唔係，佢係一個好風趣、幽默嘅人。」她憶述求婚當日在羅力威家中，對方沒有跪地、送花，但有送鑽石戒指及寫卡：「唔係話好大粒，但我感動到不停喊，諗都冇諗就應承。大家年紀都唔細，我搵到一個對的人。」

雨僑坦言有生小朋友計劃，待年中完成工作就隨時準備生。問到羅力威有甚麼進步空間？她指之前只是偶爾到對方家，要真正一起住才知道：「結婚都要置業，想有大啲嘅空間，要慢慢睇。」

提到男友執爛攤子，雨僑指當年開美容公司時訂了一大櫃傢俬：「送到嚟我連櫃都唔識開，全部都係佢幫我搞，瓷磚都係佢逐塊幫我砌。佢本身唔熟呢方面，但都為我去做。」而阿威表示愈接近婚期愈開心，得到很多人祝福，感到無比感恩和被寵愛，又坦言喜歡雨僑的內在和外在：「最重要係大家好多方面都好合拍，小至食嘅、睇嘅、聽嘅、鍾意嘅旅遊點，大至價值觀、信仰同做人標準，都能互補同互助。」他指二人吵架率極低，可以在愛情中互相扶持及一起進步。另外，二人早前在港拍攝婚紗照，準新娘更獲胡杏兒的婚紗公司贊助婚紗和晚裝。

文：音樂組