許廷鏗玩插水Jump對猛男
歌手許廷鏗（Alfred）和衛詩（Jill）將現身4月2日舉行的歌酒節音樂會壓軸尾場，Alfred表示不時都有和Jill到校園演出，台下的學生都表現得好High，所以來到今次歌酒節，在酒精的影響下應該氣氛更高漲。Jill忍不住問Alfred屆時可會跳舞？Alfred笑說：「嘩！突然間咁問到，其實我係好郁得o架，但呢啲撒手鐧都係遲啲用，不過，今次有Live Band，我覺得如果有啲歌係多啲拍子，係可以同觀眾一齊跳一齊High都唔錯嘅。（你新碟有首《強迫症進行曲》節拍強勁，有別你以往情歌風格？）係呀！呢首係幾癲喪，如果唱呢首歌同觀眾玩都幾正。」
Alfred去年試過在同一場地演出，當時他喪跑到山頂觀眾席，原來他想「Rock仔」上身玩「飛Jump」，他笑說：「咁同觀眾近啲距離係開心嘅！（唔怕Fans太瘋狂？）我反而OK喎，我好想試吓玩插水，可以飛Jump落台，但要觀眾係壯丁先得，可能有酒精幫助下，台下個個變晒壯丁猛男抬住我。」
驚飲醉失場
問到Jill可想到平時唱慣情歌的Alfred都有Wild一面？Jill笑言Alfred在她心目中一向強項是唱慢歌，更唱得好浪漫。Alfred表示當晚還有Jude（曾若華）和陳詠謙同場演出，四人音樂風格不同，走在一起時更突出各自各特色，Alfred自嘲：「我嘅特色係食方面，所以你哋唱嘅時候，我就食，你以為我飲緊羅漢果水，其實係飲緊手工啤酒，最驚係醉咗，我一醉就瞓到不省人事，希望唔好失場喇！」而Alfred稱會努力出新歌，會為邁向紅館為今年目標。
文：音樂組
攝：秦健輝